Plantun de Prouvènço

Pèr coumpara dos planto d'encò nostre

Digitalis grandiflora & Cycloloma atriplicifolium

Digitalis grandiflora

Plantaginaceae Scrophulariaceae

Nom en français : Digitale à grandes fleurs.

Descripcioun :
Aquesto poulido digitalo sèmblo à l'erbo-de-coucu, pamens èi mens forto e si flour soun mai grosso (20 à 38 mm de long) e gaire sarrado. Trachis dins li bos clar dis Aup, pas trop à l'oumbro.

Usanço :
La digitalo-di-gràndi-flour es uno planto forço empouisounanto bèn couneigudo pèr soun acioun sus lou cor. Quàuqui flour abaston pèr faire un arrèst cardia. Acò s'apren à la digitalino que dèu èstre bèn dousado pèr servi en medecino. Avans de counèisse aquelo prouprieta, li fueio de digitalo servien pèr sóuda li plago meme li pu marrido.

Port : Grando erbo
Taio : 30 à 80 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Digitalis
Famiho : Plantaginaceae
Famiho classico : Scrophulariaceae

Ordre : Lamiales

Coulour de la flour : Jauno
Petalo : irreguliero
Ø (o loungour) flour : 2 à 3,8 cm
Flourido : Printèms - Estiéu

Sòu : Ca
Autour basso e auto : 400 à 2200 m
Aparado : Noun
Remarco :
Jun à avoust

Liò : Bos clar - Esclargido - Mountagno mejano
Estànci : Subremediterran à Mountagnard
Couroulougi : Éuropenco-Pountico-Sud-Èst
Ref. sc. : Digitalis grandiflora Mill., 1768

Ciclolomo

Cycloloma atriplicifolium

Amaranthaceae Chenopodiaceae

Nom en français : Cycloloma à feuilles d'arroche.

Descripcioun :
Planto de l'an, forço raro au nostre, que trachis dins la sablo e li duno. La ciclolomo èi proun ramificado emé uno cambo en zigue-zague cuberto de péu en aragno. Li fueio, poupouso, dounon d'èr à-n-aquéli de l'armòu-fèr. Li flour soun en espigo e caduno caup 5 tepalo emé d'alo sóudado que vènon vióuleto.

Usanço :
La ciclolomo nous vèn d'Americo de l'uba. Lis indian Zuni (fotò) e Hopi (Pople Pueblò dóu Nouvèu-Messique) acampon li grano e emé la farino, mesclado à la de gros-blad, n'en fan de bouiaco e de sucrarié cuecho à la vapour.